Hugo Lloris, markvörður og fyrirliði Tottenham, gerir sér vonir um að ná að spila gegn Liverpool en liðin eigast við á Wembley í ensku úrvalsdeildinni í hádeginu á laugardaginn.
Lloris hefur verið að glíma við meiðsli og missti af leik Tottenham gegn Watford fyrir landsleikjahléið og stóð ekki vaktina í marki heimsmeistara Frakka í leikjunum á móti Þjóðverjum og Hollendingum í Þjóðadeild UEFA.
„Ég legg hart að mér að snúa til baka eins fljótt og mögulegt er og það er möguleiki á að ég spili um næstu helgi,“ sagði Lloris í samtali við frönsku útvarpsstöðina RMC.
Tottenham er með 9 stig eftir þrjá leiki en Liverpool er með fullt hús stiga eftir fjórar umferðir eins og Chelsea og Watford.
<br/><br/>