Jóhann klár gegn Úlfunum

Sean Dyche, knattspyrnustjóri Burnley, flutti góðar fréttir af íslenska landsliðsmanninum Jóhanni Berg Guðmundssyni á fréttamannafundi í dag.

Jóhann meiddist í læri í leik gegn Fulham 26. ágúst og missti af tveimur leikjum með Burnley auk landsleikjanna gegn Sviss og Belgíu. Hann er hins vegar klár í slaginn gegn Wolves í hádeginu á sunnudag:

„Jóhann er tilbúinn, svo það er gott,“ sagði Dyche þegar hann fór yfir stöðu leikmanna í Burnley-liðinu, en Jóhann hefur verið fastamaður í byrjunarliði liðsins og leikið stórt hlutverk.

Þar með hafa borist góðar fréttir af þremur byrjunarliðsmönnum úr íslenska landsliðinu í dag sem allir misstu af leikjunum við Sviss og Belgíu. Alfreð er farinn að æfa með bolta og ætti að geta byrjað að æfa með liði Augsburg í þessum mánuði, og Aron Einar Gunnarsson gæti spilað um helgina þó að líklegra sé að hann fái meiri tíma til að byggja upp hnéð eftir meiðsli.

• Blogga um frétt