Aganefnd enska knattspyrnusambandsins hefur kært Marco Ianni úr þjálfarateymi Chelsea fyrir ósæmilega hegðun undir lok leiks Chelsea og Manchester United í ensku úrvalsdeildinni á laugardaginn.
Chelsea jafnaði þá metin í uppbótartíma og Marco Ianni, aðstoðarmaður Maurizio Sarri, knattspyrnustjóra Chelsea, hljóp að José Mourinho og fagnaði innilega beint fyrir framan hann. Mourinho, núverandi stjóri United, er sem kunnugt er fyrrverandi stjóri Chelsea og var ekki ánægður með þessa ögrun.
Mourinho sagði á fréttamannafundi í dag fyrir leikinn gegn Juventus í Meistaradeildinni annað kvöld að bæði Sarri og Ianni hafi beðist afsökunar.
„Ianni hefur beðið mig afsökunar og ég tók henni. Ég tel að hann verðskuldi annað tækifæri og verðskuldar ekki að verða rekinn. Allir gera mistök og ég hef sjálfur gert fullt af mistökum,“ sagði Mourinho, sem ekki verður kærður af aganefndinni fyrir sinn þátt í upphlaupinu sem varð í lok leiksins.