Marco Silva, knattspyrnustjóri Everton, segist ekki reikna með því að Gylfi Þór Sigurðsson geti spilað með íslenska landsliðinu í komandi landsleikjum eftir að hann meiddist í leiknum gegn Chelsea í dag í ensku úrvalsdeildinni.
Brasilíumaðurinn Jorginho tæklaði Gylfa illa í fyrri hálfleiknum og lá Gylfi nokkuð lengi eftir, á meðan hlúð var að honum. Eftir aðhlynningu sneri hann aftur inn á völlinn og lék fram á 75. mínútu en var þá skipt af velli. Enska götublaðið The Sun birti svo mynd af Gylfa eftir leik þar sem sjá má að hann er með hægri löppina í miklum umbúðum.
Silva var spurður út í annað atvik í leiknum, þegar upp úr sauð á milli Bernard og Antonio Rüdiger, og benti þá á tæklingu Jorginho:
„Ég vona að við verðum ekki án Gylfa í næstu leikjum eftir þessa tæklingu frá Jorginho. Núna tekur við landsleikjahlé en ég held að hann sé ekki í ástandi til þess að spila þá leiki,“ sagði Silva en Ísland mætir Belgíu í Þjóðadeildinni á fimmtudag og svo Katar í vináttulandsleik þremur dögum síðar.
Fyrr í dag varð ljóst að Jóhann Berg Guðmundsson yrði ekki með í landsleikjunum en Andri Rúnar Bjarnason hefur verið kallaður inn í hans stað.