Enskir fjölmiðlar telja nokkuð víst að Arsenal losi sig við egypska miðjumanninn Mohamed Elneny þegar opnað verður fyrir félagaskipti í janúar.
Elneny hefur ekkert komið við sögu með Arsenal í ensku úrvalsdeildinni á þessu tímabili og fram kemur í enska blaðinu Mirror að Arsenal sé reiðubúið að selja hann fyrir 15 milljónir punda.
Egyptinn, sem er 26 ára gamall, gekk í raðir Arsenal frá svissneska liðinu Basel. Hann hefur spilað 38 deildarleiki með Arsenal frá því hann kom til liðsins en hefur ekki tekist að skora fyrir Lundúnaliðið.