Norðmaðurinn Ole Gunnar Solskjær er tekinn við stjórastarfinu hjá Manchester United af José Mourinho og mun stýra liðinu út þessa leiktíð en vefur Manchester United greindi frá þessu nú rétt í þessu.
Solskjær kom fyrst til Manchester United árið 1996 sem leikmaður og var mjög vinsæll á meðal stuðningsmanna félagsins og er í guða tölu hjá mörgum þeirra eftir að hann skoraði sigurmark United gegn Bayern München í úrslitaleik Meistaradeildarinnar árið 1999. Hann þjálfaði svo um tíma varalið félagsins og þekkir hann því afar vel til þess. Solskjær skoraði 126 mörk í 366 leikjum með Manchester United á árunum 1996-2007.
Með Solskjær í þjálfarateyminu verða Mike Phelan, fyrrverandi aðstoðarstjóri United, Michael Carrick og Kieran McKenna.
„Manchester United er í hjarta mínu og það er frábært að koma aftur til félagsins. Ég hlakka til að vinna með hæfileikaríkum leikmönnum, starfsmönnum og öllum hjá félaginu,“ segir Solskjær á vef Manchester United.
Solskjær er núverandi þjálfari norska úrvalsdeildarliðsins Molde og framlengdi á dögunum samning sinn við félagið. Hann var knattspyrnustjóri Cardiff árið 2014 og lék landsliðsfyrirliðinn Aron Einar Gunnarsson undir hans stjórn.
Solskjær tók við stjórastarfinu hjá Cardiff í janúar 2014. Liðið var þá í úrvalsdeildinni en endaði í 20. sæti og féll úr deildinni. Liðið fór illa af stað í B-deildinni undir stjórn Norðmannsins og hann var rekinn frá störfum í september 2014. Solskjær hefur verið við stjórnvölinn hjá Molde frá árinu 2015 og hafnaði liðið í öðru sæti í norsku úrvalsdeildinni í ár.
Fyrsti leikur Manchester United undir stjórn Solskjærs verður einmitt á móti Cardiff en liðin eigast við í ensku úrvalsdeildinni í Cardiff á laugardaginn.
We can confirm that Ole Gunnar Solskjaer has been appointed as caretaker manager until the end of the 2018/19 season.
— Manchester United (@ManUtd) December 19, 2018
He will be joined by Mike Phelan as first-team coach, together with Michael Carrick and Kieran McKenna. #MUFC