Var Arnautovic að kveðja West Ham?

Marko Arnautovic veifaði bless til stuðningsmanna West Ham áður en ...
Marko Arnautovic veifaði bless til stuðningsmanna West Ham áður en hann fór af velli. AFP

Austurríski landsliðsmaðurinn Marko Arnautovic gæti hafa verið að syngja sitt síðasta fyrir West Ham í 1:0-sigri liðsins á Arsenal í ensku úrvalsdeildinni í knattspyrnu rétt í þessu.

West Ham barst fyrr í vikunni risatilboð í sóknarmanninn frá ónefndu kínversku liði en tilboðið, að sögn BBC, er sagt hljóða upp á 35 milljónir punda, jafnvirði 5,4 milljarða íslenskra króna. Bróðir Arnautovic, sem er jafnframt umboðsmaður hans, sagði við miðilinn talkSPORT að framherjinn vilji yfirgefa félagið og hann virtist gefa það í skyn á leikvanginum í Lundúnum í dag.

Arnautovic var tekinn af velli á 71. mínútu eftir að hafa átt rólegan leik og hann sneri sér í allar áttir til að veifa til stuðningsmanna West Ham. Í leikslok, er leikmenn, starfslið og stuðningsmenn fögnuðu vel og innilega fræknum og langþráðum sigri gegn nágrönnunum, var Austurríkismaðurinn langfyrstur til að marséra rakleiðis til búningsklefa án þess að taka þátt í fögnuðinum.

mbl.is