Argentínski sóknarmaðurinn Gonzalo Higuaín er kominn til Lundúna þar sem hann mun gangast undir læknisskoðun hjá Chelsea.
Higuaín er samningsbundinn Juventus en var í láni hjá AC Milan fyrri hluta leiktíðar. Hann kemur einnig á láni til Chelsea, en þó að skiptin hafi legið í loftinu í rúma viku er fyrst núna eitthvað farið að gerast í þeim efnum. AC Milan vildi ekki sleppa honum fyrr en arftaki væri fundinn og nú virðist Krzusztof Piatek, framherji Genoa, á leið til Mílanó.
Higuain er 31 árs gamall og hefur leikið með Real Madrid, Juventus og Napoli, en hjá síðastnefnda liðinu spilaði hann einmitt undir stjórn Maurizio Sarri sem nú stýrir Chelsea. Hann á að baki 75 leiki með argentínska landsliðinu og hefur í þeim skorað 31 mark.