Enn eru meiðsli að gera Manchester United lífið leitt en liðið verður í eldlínunni í átta liða úrslitum ensku bikarkeppninnar í knattspyrnu annað kvöld.
Manchester United sækir Wolves heim klukkan 20 annað kvöld og þar mun liðið leika án belgíska framherjans Romelu Lukaku sem hefur verið sjóðandi heitur í síðustu leikjum og hefur skorað sex mörk í fjórum leikjum.
Enskir fjölmiðlar greina frá því að Lukaku sé að glíma við ökklameiðsli sem hann varð fyrir í sigri United gegn Paris SG í Meistaradeildinni. Lukaku tók engu að síður þátt í leiknum gegn Arsenal um síðustu helgi en meiðslin ágerðust eftir leikinn og afar ólíklegt er að hann verði með Manchester-liðinu annað kvöld og hann kemur líka til með að missa af leikjum Belga gegn Rússum og Kýpverjum í undankeppni EM.
Fyrir á meiðslalistanum hjá United eru Jesse Lingard, Juan Mata og Alexiz Sánchez en reiknað er með að Ander Herrera snúi til baka eftir að hafa misst af síðustu leikjum vegna meiðsla.