Enskir fjölmiðlar greina frá því að Thomas Tuchel, þjálfari franska meistaraliðsins Paris SG, vilji ólmur fá brasilíska sóknarmanninn Roberto Firmino til liðs við sig frá Liverpool í sumar.
Firmino hefur leikið stórt hlutverk með Liverpool frá því hann kom til félagsins frá þýska liðinu Hoffenheim fyrir fjórum árum. Firmino hefur skorað 16 mörk fyrir liðið í öllum keppnum á leiktíðinni en Liverpool á einn leik eftir, úrslitaleikinn gegn Tottenham í Meistaradeildinni í Madrid 1. júní.
Afar ólíklegt er talið að Liverpool sé tilbúið að selja Brasilíumanninn en hann er gríðarlega vinsæll á meðal stuðningsmanna liðsins og hefur átt stóran þátt í frábæru gengi liðsins á tímabilinu. Firmino hefur glímt við meiðsli síðustu vikurnar en hann ætti að verða klár í slaginn þegar Liverpool mætir Tottenham í úrslitaleiknum.