Jürgen Klopp, knattspyrnustjóri Liverpool, ætlar að hreinsa duglega til í leikmannahópi sínum í sumar. Enskir fjölmiðla greina frá því að Liverpool gæti selt leikmenn fyrir 100 milljónir punda. Klopp ætlar sér að nota þann pening til þess að styrkja hópinn ennþá frekar fyrir átökin á næstu leiktíð.
Liverpool hefur átt mjög gott tímabil en liðið endaði í öðru sæti ensku úrvalsdeildarinnar með 97 stig, einu stigi minna en Manchester City, sem lyfti Englandsmeistaratitlinum annað árið í röð um síðustu helgi. Þá er Liverpool komið í úrslit Meistaradeildarinnar, annað árið í röð, eftir ótrúlega endurkomu gegn Barcelona í undanúrslitum keppninnar.
Marko Grujic, Harry Wilson, Nathaniel Clyne, Simon Mignolet og Adam Lallana eru allt leikmenn sem munu að öllum líkindum yfirgefa félagið í sumar fyrir háar upphæðir. Daniel Sturridge og Albreto Moreno munu yfirgefa félagið á frjálsri sölu og þá munu leikmenn úr akademíu félagsins einnig verða seldir.
Klopp hefur sjálfur gefið það út að hann ætli sér ekki að versla mikið í sumar en leikmenn eins og Matthijs de Ligt, fyrirliði Ajax, og Julian Brandt, sóknarmaður Bayer Leverkusen hafa báðir verið orðaðir við félagið að undanförnu líkt og Isco, sóknarmaður Real Madrid.