Manchester United hefur sett sig í samband við spænska liðið Atlético Madrid um hugsanleg kaup félagsins á franska landsliðsmanninum Antoine Griezmann að því er fram kemur í enska blaðinu Independent í dag.
Griezmann greindi frá því á dögunum að hann vildi yfirgefa Atlético Madrid og var hann þegar orðaður við Spánarmeistara Barcelona.
Hæstráðendur á Camp Nou eru hins vegar ekki sagðir vera tilbúnir að greiða uppsett verð fyrir Frakkann en verðmiðinn á honum er 108 milljónir evra sem jafngildir um 15 milljörðum króna.
Griezmann, sem er 28 ára gamall, hefur leikið með Atlético Madrid frá árinu 2014.