Knattspyrnumaðurinn Alexis Sánchez gæti enn verið á förum frá Manchester United, þrátt fyrir að Ole Gunnar Solskjær, knattspyrnustjóri liðsins, hafi gefið annað í skyn í gær.
Nýjustu fréttir herma að ítalska félagið Inter vilji kaupa Sílemanninn en belgíski sóknarmaðurinn Romelu Lukaku gekk til liðs við Inter frá United nýlega. Það er Sky Sports á Ítalíu sem segir félagið nú ætla reyna við Sánchez þrátt fyrir ummæli Solskjær í gær. Þá hefur Roma verið sagt vilja fá hann að láni.
„Hann hefur ekki verið settur í varaliðið, að sjálfsögðu ekki. Alexis er mikill atvinnumaður og vill vera hluti af mínu liði. Við erum ekki með marga sóknarmenn í liðinu og hann mun örugglega spila mun meira en þið mynduð halda. Við búumst við því að hann standi sig vel. Hann er að æfa af krafti og gerir mikið aukalega og hann mun smátt og smátt komast í betra form,“ sagði Norðmaðurinn, en Sánhcez hefur verið að glíma við meiðsli í sumar.