Liverpool vann sannfærandi 3:1-sigur á Arsenal í stórleik 3. umferðar ensku úrvalsdeildarinnar í fótbolta í dag. Liverpool er með fullt hús stiga eftir þrjár umferðir á meðan Arsenal var að tapa sínum fyrstu stigum.
Joel Matip kom Liverpool á bragðið með skalla eftir hornspyrnu Trent Alexander-Arnold á 41. mínútu og reyndist það eina mark fyrri hálfleiks. Það tók Liverpool aðeins fjórar mínútur í seinni hálfleik til að bæta í forskotið. Mo Salah skoraði úr víti á 39. mínútu eftir að David Luiz togaði í treyjuna hans innan teigs.
Salah var svo aftur á ferðinni níu mínútum síðar. Hann fékk þá boltann nálægt miðlínunni, fór illa með Luiz og stakk Nacho Monreal áður en hann lagði boltann í bláhornið fjær. Varamaðurinn Lucas Torreira minnkaði muninn fyrir Arsenal á 85. mínútu en nær komust Arsenal-menn ekki.