Liverpool vann dramatískan 2:1-sigur á Leicester á Anfield í ensku úrvalsdeildinni í dag þökk sé sigurmarki James Milner úr vítaspyrnu í uppbótartíma. Aston Villa burstaði Norwich í nýliðaslagnum og Jóhann Berg Guðmundsson hafði betur í Íslendingaslagnum er Burnley vann 1:0 gegn Everton.
Liverpool er áfram með fullt hús stiga eftir sjö umferðir þökk sé sigurmarki Milner en leikurinn var fjörugur. Sadio Mané kom heimamönnum yfir á 40. mínútu og Liverpool var heilt yfir betri aðili leiksins en gestirnir, sem hefðu getað komist í annað sætið með sigri, voru aldrei langt undan og kreistu fram jöfnunarmark á 80. mínútu en það skoraði James Maddison. Á fimmtu mínútu uppbótartímans gaf Marc Albrighton hins vegar klaufalega vítaspyrnu þegar hann braut á Mané og Milner skoraði af öryggi, 17. sigurleikur Liverpool í röð í deildinni.
Jóhann Berg og Gylfi Þór Sigurðsson voru í byrjunarliðum þegar Burnley og Everton mættust á Turf Moor. Jóhann var tekinn af velli á 84. mínútu en sigurmarkið gerði félagi hans, Jeff Hendrick, á 72. mínútu. Everton fékk rautt spjald á 56. mínútu þegar Séamus Coleman fékk sitt annað gula spjald og var Gylfa fórnað fyrir annan bakvörð á 59. mínútu.
Þá vann Aston Villa risasigur á Norwich á útivelli í nýliðaslag liðanna, 5:1, en hinir nýliðarnir, Sheffield United, gerðu markalaust jafntefli í heimsókn sinni til Watford.
Úrslitin
Burnley - Everton 1:0
Liverpool - Leicester 2:1
Norwich - Aston Villa 1:5
Watford - Sheffield United 0:0