Liverpool vann dramatískan 2:1-sigur á Leicester á Anfield í ensku úrvalsdeildinni í dag þökk sé sigurmarki James Milner úr vítaspyrnu í uppbótartíma.
Liverpool er áfram með fullt hús stiga eftir sjö umferðir þökk sé sigurmarki Milner en leikurinn var fjörugur. Sadio Mané kom heimamönnum yfir á 40. mínútu og Liverpool var heilt yfir betri aðili leiksins en gestirnir, sem hefðu getað komist í annað sætið með sigri, voru aldrei langt undan. Þeir kreistu fram jöfnunarmark á 80. mínútu en það skoraði James Maddison.
Á fimmtu mínútu uppbótartímans gaf Marc Albrighton hins vegar klaufalega vítaspyrnu þegar hann braut á Mané og Milner skoraði af öryggi, 17. sigurleikur Liverpool í röð í deildinni.
Í spilaranum hér fyrir ofan má sjá alla dramatíkina og svipmyndir úr leiknum.