María Þórisdóttir reyndist hetja Chelsea þegar liðið vann dramatískan 2:1-sigur gegn Arsenal í ensku úrvalsdeildinni í knattspyrnu í Surrey í gær.
Bethany England jafnaði metin fyrir Chelsea á 57. mínútu og var staðan 1:1 í leiknum þegar María kom inn á sem varamaður fyrir hina norsku Guro Reiten á 74. mínútu. Það tók Maríu ekki nema níu mínútur að stimpla sig inn.
Hún skoraði sigurmark Chelsea á 85. mínútu með laglegu skoti fyrir utan teig eftir sendingu frá Ramonu Bachmann sem kom einnig inn á sem varamaður á 74. mínútu.
Á meðfylgjandi myndskeiði má sjá helstu atriðin í leiknum og mörkin þrjú.