Sol Campbell hefur verið ráðinn knattspyrnustjóri enska C-deildarfélagsins Southend United og Hermann Hreiðarsson, fyrrverandi landsliðsfyrirliði, verður aðstoðarmaður hans en félagið staðfestir þetta á heimasíðu sinni.
Kevin Bond hætti með Southend í september og var án knattspyrnustjóra þar til nú. Hermann var aðstoðarmaður hjá Campbell hjá Macclesfield Town í stuttan tíma. Þá mun Andy Cole, fyrrverandi framherji Manchester United, einnig koma inn í þjálfarateymi félagsins. Campbell hefur verið án starfs síðan hann hætti sem stjóri D-deildarliðsins Macclesfield Town í ágúst.
Gengi Southend United á þessari leiktíð hefur verið afleitt en liðið er í 22. sæti eða næst neðsta sæti ensku C-deildarinnar með 5 stig. Liðið hefur tapað 10 leikjum, unnið einn og gert tvö jafntefli í fyrstu þrettán leikjum sínum.