Tapi Liverpool ekki fyrir Crystal Palace þegar liðin eigast við á Selhurst Park í ensku úrvalsdeildinni á laugardaginn verður það fimmta liðið í ensku úrvalsdeildinni sem spilar 30 leiki í röð án taps í deildinni.
Liverpool tapaði síðast deildarleik gegn Manchester City 3. janúar á þessu ári en það sem eftir var af tímabilinu tapaði það ekki leik og er ósigrað í fyrstu tólf leikjunum á þessu tímabili.
Bara fjögur lið, frá þremur ólíkum félögum, hafa afrekað þetta.
Arsenal tapaði ekki 49 leikjum í röð frá 7. maí 2003 til 16. október 2004.
Chelsea tapaði ekki 40 leikjum í röð frá 23. október 2004 til 29. október 2005.
Arsenal tapaði ekki 30 leikjum í röð frá 23. desember 2001 til 6. oktober 2002.
Manchester City tapaði ekki 30 leikjum í röð frá 8. apríl 2017 til 2. janúar 2018.
Nottingham Forest á hins vegar næstbesta árangurinn í efstu deild á Englandi og setti met sem Arsenal sló árið 2004. Forest tapaði ekki leik í deildinni frá 26. nóvember 1977 til 9. desember 1978, eða 42 leikjum í röð.