Skotmark Liverpool á leið til Tottenham

Timo Werner, framherji þýska knattspyrnufélagsins RB Leipzig hefur verið sterklega orðaður við Liverpool að undanförnu. Enskir fjölmiðlar fullyrtu í vikunni að Liverpool ætlaði sér að virkja klásúlu í samningi framherjans sem hljóðar upp á 50 milljónir punda næsta sumar en Werner er 23 ára gamall þýskur landsliðsmaður.

Hann hefur skorað 20 mörk í 21 leik í þýsku 1. deildinni á tímabilinu og er næst markahæsti leikmaður deildarinnar á eftir Robert Lewandowski, framherja Bayern München, sem hefur skorað 22 mörk. Þá hefur Werner einnig lagt upp sex mörk í deildinni en Jürgen Klopp sér hann sem fullkomna viðbót fyrir sóknarleik enska liðsins.

Indykaila News setti inn færslu á Twitter í morgun þar sem talað var um áhuga Liverpool á Werner. RB Leipzig svaraði færslunni og sagði Werner hins vegar vera á leið til Tottenham. Leikmaðurinn er hins vegar ekki að ganga til liðs við Tottenham því liðin mætast í sextán liða úrslitum Meistaradeildarinnar og fer fyrri leikur liðanna fram í London, 19. febrúar næstkomandi.

• Blogga um frétt