Getum ekki neytt Salah til að spila

Shawky Gharib, þjálfari ólympíulandsliðs Egyptalands í knattspyrnu, hefur staðfest að Mohamed Salah sé í hópnum sem knattspyrnusamband landsins hefur tilkynnt vegna Ólympíuleikanna í Tókýó í sumar.

Gharib skýrði frá því í lok janúar að hann vildi hafa Salah í liðinu í Tókýó en þar spila leikmenn 23 ára og yngri ásamt því að hvert lið má vera með þrjá eldri leikmenn.

Frétt af mbl.is

Salah ekki með í byrjun næsta tímabils?

„Við getum ekki neytt Salah til að spila með okkur. Það er í höndum hans, Liverpool og Jürgens Klopp að taka þá ákvörðun en ég hef valið hann í 50 manna hópinn. Endanlegur 18 manna hópur verður tilkynntur í júní,“ sagði Gharib við Reuters.

Samkvæmt reglum FIFA eru félög ekki skyldug til að gefa leikmenn eldri en 23 ára lausa fyrir leikana í Tókýó. Fari Salah þangað gæti hann misst af byrjun tímabilsins á Englandi sem hefst sama dag og knattspyrnukeppni Ólympíuleikanna lýkur og hann yrði ekkert með Liverpool á undirbúningstímabilinu.

• Blogga um frétt