Jóhann Berg Guðmundsson, landsliðsmaður í knattspyrnu, verður klár í slaginn er lið hans Burnley fær Bournemouth í heimsókn í ensku úrvalsdeildinni á laugardag og verður í leikmannahópi liðsins.
Þetta staðfesti Sean Dyche, knattspyrnustjóri Burnley, á blaðamannafundi í dag.
Jóhann hefur ekkert leikið með Burnley síðan hann meiddist í leik gegn Peterbrough í enska bikarnum í byrjun árs og hefur misst af sex síðustu leikjum liðsins.
Kantmaðurinn var þá nýkominn af stað á ný eftir þriggja mánaða meiðsli. Hann hefur því verið mikið frá keppni síðasta tæpa hálfa árið.