Carlo Ancelotti, knattspyrnustjóri Everton, hefur verið sektaður um átta þúsund pund af enska knattspyrnusambandinu fyrir hegðun sína eftir leik Everton og Manchester United í ensku úrvalsdeildinni á sunnudaginn. Leiknum lauk með 1:1-jafntefli en Everton skoraði mark í uppbótartíma sem var dæmt af vegna rangstöðu við lítinn fögnuð ítalska stjórans.
Gylfi Þór Sigurðsson var þá dæmdur rangstæður en skot Dominic Calvert-Lewin fór af Harry Maguire, varnarmanni United, og þaðan í netið. Gylfi Þór var hins vegar fyrir innan og þótti íslenski miðjumaðurinn trufla David de Gea í marki United. Ancelotti taldi að þar sem Gylfi hefði legið í grasinu hefði hann ekki truflað spænska markmanninn.
Ítalinn lét Chris Kavanagh dómara heyra það í leikslok og fékk að launum rautt spjald og kæru frá knattspyrnusambandinu. Hann játaði sök og baðst afsökunar á hegðun sinni. Hann missir því ekki af næsta leik liðsins gegn Chelsea á Stamford Bridge 8. mars. Ancelotti stýrði Chelsea á árunum 2009 til 2011 og gerði liðið meðal annars að enskum meistara og bikarmeistara árið 2010.