Enska knattspyrnufélagið Manchester United er nú í viðræðum við kínverska félagið Shanghai Shenhua um kaup enska liðsins á framherjanum Odion Ighalo en það eru enskir fjölmiðlar sem greina frá þessu.
Ighalo er sem stendur á láni hjá enska félaginu en hann hefur skorað fjögur mörk í átta leikjum fyrir United á tímabilinu.
Lánssamningur Ighalo rennur út í sumar en United er tilbúið að borga í kringum 15 milljónir punda fyrir nígeríska framherjann sem er þrítugur að árum. Enskir fjölmiðlar segja að forráðamenn United séu sannfærðir um að þeir geti klárað kaupin á næstu dögum en tímablið á Englandi gæti dregist eitthvað fram á næsta haust vegna kórónuveirunnar.
Manchester United er sem stendur í fimmta sæti ensku úrvalsdeildarinnar með 45 stig eftir 29 spilaða leiki. Liðið er í harðri baráttu um Meistaradeildarsæti en Ighalo var fenginn til félagsins eftir að ljóst var að enski landsliðsmaðurinn Marcus Rashford myndi missa af stórum hluta leiktíðarinnar vegna meiðsla.