Framherjinn Odion Ighalo er að láni hjá Manchester United frá kínverska félaginu Shanghai Shenhua og hefur heldur betur farið vel af stað á Englandi. Nígeríumaðurinn hefur skorað fjögur mörk í átta leikjum.
United er sagt hafa áhuga á að halda kappanum, en lánssamningurinn rennur út eftir tímabilið. Kínverska félagið virðist þó líka vilja endurheimta leikmann sinn og hefur gert nígeríska landsliðsmanninum nýtt og gott tilboð.
Paul Merson, sparkspekingur á Sky Sports, segir þó að hann yrði steinhissa ef United lætur framherjann öfluga fara frá sér í sumar. „Hann hefur verið frábær síðan hann kom á Old Trafford, hann hefur ekki spilað mikið undanfarið en lítur rosalega vel út þegar hann spilar,“ sagði Merson á Sky.
„Allt hefur farið á besta veg hjá honum hingað til og ef United býður honum tækifærið til að vera áfram, þá verð ég steinhissa ef hann segir nei.“