Forráðamenn ensku úrvalsdeildarinnar í knattspyrnu og samtaka leikmanna munu funda í dag varðandi fyrirhugaða launalækkun vegna kórónuveirufaraldursins sem nú herjar á heimsbyggðina.
Félögin sjálf samþykktu einróma í gær að ræða við leikmenn sína um þessar fyrirhugðu aðgerðir en til stendur að allir leikmenn taki á sig 30% launalækkun. Úrvalsdeildin mun í kjölfarið gefa 20 milljónir punda til breska heilbrigðiskerfisins og 120 milljónir punda til neðri deildanna.
Deildin hefur nú verið í fríi í tæpan mánuð en síðasti leikur hennar var leikur Leicester og Aston Villa í Leicester 9. mars síðastliðinn. Deildin mun ekki hefjast á ný fyrr en í fyrsta lagi í júní.