Stuðningsmenn enska knattspyrnufélagsins Tottenham eru afar ósáttir við þá ákvörðun félagsins að ætla að þiggja aðstoð frá breska ríkinu við að greiða laun starfsmanna félagsins. Samkvæmt nýjum neyðarlögum í Bretlandi mun ríkið greiða 80% launa hjá starfsfólki fyrirtækja í landinu til þess að létta undir með fólki á meðan kórónuveirufaraldurinn geisar.
Nokkur knattspyrnufélög á Englandi ákváðu að nýta sér þessa leið stjórnvalda, þar á meðal Liverpool, en félagið fékk mikla gagnrýni á sig vegna þessa enda hagnaðist Liverpool um 42 milljónir punda á síðasta ári. Peter Moore, framkvæmdastjóri Liverpool, sendi hins vegar frá sér yfirlýsingu í gær og sagði að félagið væri hætt við að nýta sér aðstoð stjórnvalda.
Stuðningsmenn Tottenham hafa nú sett mikla pressu á Daniel Levy, stjórnarformann félagsins, um að draga í land með ríkisaðstoðina og sjá sóma sinn í því að greiða sjálfur laun starfsólksins. Tottenham og Liverpool eru á meðal ríkustu félaga Bretlands og því hafa bæði lið fengið harða gagnrýni á undanförnum dögum.