Æfa án takmarkana á Englandi

Öll félögin í ensku úrvalsdeildinni samþykktu einróma að byrja að æfa án takmarkana frá og með deginum í dag. Ekkert hefur verið spilað á Englandi síðan um miðjan mars og þá gátu liðin byrjað að æfa fyrir tæpum tveimur vikum en með takmörkunum.

Hingað til hafa félögin getað æft með alls kyns takmörkunum; leikmenn hafa þurft að æfa í litlum hópum og þá hefur snerting verið lágmörkuð. Félögin munu áfram ræða sín á milli um hvenær hægt verður að hefja deildina aftur en það á eftir að spila átta umferðir af tímabilinu. Átta einstaklingar hafa greinst með kórónuveiruna af þeim 1.744 sem hafa verið skimaðir í kringum deildina, leikmenn og starfsmenn.

Þá þykir líklegt að keppni hefjist aftur um miðjan júní og að hægt verði að spila þá 92 leiki sem eftir eru án áhorfenda.

• Blogga um frétt