United tekur stórt lán fyrir sumarið

Enska knattspyrnufélagið Manchester United hefur tekið 140 milljóna punda lán sem verður notað til þess að kaupa nýja leikmenn í sumar en það er Manchester Evening News sem greinir frá þessu í kvöld. Mörg félög eru í miklum fjárhagsvandræðum vegna kórónuveirufaraldursins sem hefur herjað á heimsbyggðina og ríkir mikil óvissa á félagaskiptamarkaðnum þessa dagana.

Flest stórlið halda að sér höndunum þegar kemur að því að kaupa nýja leikmenn enda enn þá óljóst hvaða áhrif kórónuveiran mun hafa á fjárhag margra liða í heimsfótboltanum í dag. Óvíst er hvenær stuðningsmenn mega mæta aftur á völlinn og fari svo að það dragist á langinn mun það hafa afar slæmar afleiðingar fyrir fjárhag félaganna sem treysta mörg hver á innkomu á leikdögum.

Manchester United ætlar sér hins vegar að styrkja hópinn með að minnsta kosti þremur nýjum leikmönnum samkvæmt MEN. Ed Woodward sér fram á að gera gert góð kaup á félagaskiptamarkaðnum í sumar vegna faraldursins og þá hefur hann trú á því að auglýsingasamningar og sjónvarpstekjur félagsins dugi til þess að borga niður lán sumarsins á stuttum tíma.

• Blogga um frétt