Knattspyrnustjórinn Brendan Rodgers smitaðist af kórónuveirunni skömmu eftir að ensku úrvalsdeildinni var frestað um miðjan mars. Þetta staðfesti hann í viðtali við BBC í dag.
Rodgers, sem nú stýrir liði Leicester, segist hafa fundið fyrir einkennum veirunnar og hafi þá í kjölfarið gengist undir skimun. Þar kom í ljós að bæði hann og eiginkonan voru smituð.
Úrvalsdeildin mun hefjast aftur 17. júní eftir rúmlega þriggja mánaða hlé og getur gamla félag Rodgers þá loks bundið enda á 30 ára eyðimerkurgöngu sína. Hann stýrði sjálfur Liverpool um árabil og komst sjálfur nálægt því að enda langa bið félagsins eftir meistaratitlinum árið 2014 en Liverpool varð síðast enskur meistari 1990.
Núverandi lið hans, Leicester, hefur einnig að miklu að keppa enda situr liðið í 3. sæti og getur tryggt sér þátttöku í Meistaradeild Evrópu á næstu leiktíð.