Manchester United virðist, eftir allt, ætla að halda sóknarmanninum Odion Ighalo innan sinna raða út tímabilið í ensku úrvalsdeildinni í knattspyrnu og í upphafi næstu leiktíðar líka. Samkvæmt heimildum Goal mun hann vera á láni hjá United þangað til í janúar en hann er samningsbundinn kínverska liðinu Shenghai Shenhua.
Shenghai Shenhua vildi fá Ighalo aftur til sín um helgina þar sem kínverska deildin mun brátt hefja göngu sína á ný en hann er lykilmaður í liðinu. Upprunalegi lánssamningurinn hans rennur út á morgun. Félagið hafði áhuga á að selja Ighalo til United en ekki framlengja lánssamninginn og virtust því viðræður félaganna sigldar í strand.
Goal greindi svo frá því fyrir tveimur dögum að félögin væru að nálgast samkomulag um að Ighalo yrði áfram hjá United og myndi alla vega klára tímabilið, sem hefst aftur 17. júní, í Manchester. Nú segir miðillinn frá því að hinn nýi samningur muni gilda út janúar. Það fer þó hver að verða síðastur að ganga frá málunum, enda rúmur sólarhringur í að lánssamningurinn fyrsti renni út.