Forráðamenn Tottenham bíða nú eftir ákvörðun varnarmannsins Jan Vertonghen, en sá verður samningslaus 30. júní og hefur ekki viljað framlengja við enska félagið. Úrvalsdeildartímabilið verður ekki búið um næstu mánaðarmót vegna kórónuveirufaraldursins.
Félagið hefur beðið Vertonghen, sem er orðinn 33 ára gamall, um að vera áfram út tímabilið en Belginn er sagður vera að íhuga möguleika sína samkvæmt heimildum BBC. Hann hefur verið í herbúðum félagsins síðan 2012 en er sagður vilja langtímasamning í Lundúnum þrátt fyrir að vera orðinn þetta gamall.
Ekkert hefur verið leikið í ensku úrvalsdeildinni síðan 9. mars en forráðamenn deildarinnar stefna á að byrja spila að nýju 17. júní. Alls eru níu umferðir eftir af tímabilinu á Englandi eða 92 leikir en stefnt er á að ensku úrvalsdeildinni verði lokið í ágúst, ef allt gengur eftir.
Vertonghen hefur vakið athygli nokkurra liða í Evrópu en Napoli og Inter Mílanó á Ítalíu eru sögð fylgjast með honum ásamt einhverjum félögum á Spáni.