Liverpool er með níu fingur á Englandsmeistaratitlinum eftir stórsigur gegn Crystal Palace í ensku úrvalsdeildinni í knattspyrnu á Anfield í Liverpool í kvöld. Leiknum lauk með 4:0-sigri Liverpool sem er nú með 86 stig, 23 stigum meira en Manchester City, og Liverpool getur orðið meistari á morgun ef City tapar fyrir Chelsea á Stamford Bridge í London.
Trent Alexander-Arnold kom Liverpool yfir á 23. mínútu með stórglæsilegu marki, beint úr aukaspyrnu, af 25 metra færi. Mohamed Salah bætti svo við öðru marki Liverpool eftir laglega stungusendingu frá Fabinho og staðan því 2:0 í hálfleik.
Fabinho bætti við þriðja marki Liverpool í upphafi fyrri hálfleiks með þrumufleyg af 35 metra færi. Það var svo Sadio Mané sem átti lokaorðið fyrir Liverpool á 69. mínútu þegar Mohamed Salah sendi hann í gegn og Mané kláraði af yfirvegun fram hjá Wayne Hennessey í marki Palace.
Liverpool fer með sigrinum upp í 86 stig í efsta sæti deildarinnar en Crystal Palace er í níunda sætinu með 42 stig, sjö stigum minna en Manchester United og Wolves, sem eru í fimmta og sjötta sætinu.