Arsenal er komið í undanúrslit ensku bikarkeppninnar í fótbolta eftir dramatískan 2:1-sigur á Sheffield United á útivelli í dag. Tvö mörk litu dagsins ljós á síðustu þremur mínútum leiksins.
Nicolas Pépé skoraði eina mark fyrri hálfleiks úr vítaspyrnu eftir að Chris Basham braut klaufalega af sér innan teigs. Var staðan 1:0 þar til David McGoldrick jafnaði á 87. mínútu eftir klaufaskap í vörn Arsenal.
Sheffield fékk nokkur væri til að skora sigurmarkið, en Arsenal nýtti skyndisókn í uppbótartíma og varamaðurinn Dani Ceballos skoraði sigurmarkið með fallegri afgreiðslu úr þröngu færi.
Arsenal og Manchester United eru því komin í undanúrslit. Síðar í dag mætast annars vegar Leicester og Chelsea og hins vegar Newcastle og Manchester City.