Fowler setur fjölskylduna í forgang

Robbie Fowler, sem lengi lék með enska knattspyrnuliðinu Liverpool, hefur ákveðið að hætta störfum sem þjálfari ástralska liðsins Brisbane Roar.

Þegar keppni var stöðvuð í mars vegna útbreiðslu kórónuveirunnar fór Fowler heim til Englands þar sem fjölskylda hans býr og varaformaður Brisbane Roar, Chris Fong, skýrði frá því í dag að Fowler vildi vera um kyrrt hjá fjölskyldunni og myndi því ekki snúa aftur.

„Við erum vonsviknir yfir því að þessi heimsfaraldur hafi haft þessi áhrif á framtíðarplön okkar en skiljum fullkomlega að fjölskyldan sé sett í forgang á þessum erfiðu tímum. Robbie hefur ekki bara stuðlað að stöðugleika í félaginu heldur hefur hann komið til okkar með mikla innspýtingu af þekkingu í félagið. Heimurinn hefur breyst en við áttum ekki von á þessu. Þetta er synd því við vorum á afar fallegri leið,“ sagði Fong.

Fowler, sem er 45 ára gamall, skoraði 128 mörk í 266 leikjum fyrir Liverpool í ensku úrvalsdeildinni og lék einnig með Leeds, Manchester City, Cardiff og Blackburn áður en hann lauk ferlinum í Ástralíu og Taílandi. Hann tók við liði Brisbane í apríl 2019 og samdi til tveggja ára.

• Blogga um frétt