Hollendingurinn Nathan Aké, sem margir telja einn af bestu miðvörðum ensku úrvalsdeildarinnar í knattspyrnu, leikur ekki meira með Bournemouth á tímabilinu.
Eddie Howe knattspyrnustjóri Bournemouth upplýsti um þetta á fréttamannafundi sínum í gær en varnarmaðurinn meiddist í 4:1-sigri liðsins gegn Leicester um helgina. Sigurinn var Bournemouth lífsnauðsynlegur en liðið er í fallsæti, þremur stigum frá því að bjarga sér þegar þrjár umferðir eru eftir.
Bournemouth mætir Manchester City á miðvikudaginn, Southampton um helgina og svo Everton í lokaumferðinni en Aké verður fjarri góðu gamni eftir að hafa farið meiddur af velli í hálfleik gegn Leicester. Það er áfall fyrir liðið enda hefur hann verið besti leikmaður liðsins í vetur.
Aké hefur verið talsvert orðaður við stóru liðin í deildinni og talið er að bæði Chelsea og Manchester City hafi mikinn áhuga á að fá hann í sínar raðir. Aké, sem er 25 ára og hefur leikið 13 landsleiki fyrir Holland, var í röðum Chelsea í sex ár en fékk aðeins tækifæri í sjö leikjum í úrvalsdeildinni og var lánaður til Bournemouth árið 2016 og gekk alfarið til liðs við félagið ári síðar.