Knattspyrnustjórarnir Jürgen Klopp og Frank Lampard elda nú saman grátt silfur eftir leik Liverpool og Chelsea á Anfield í ensku úrvalsdeildinni á miðvikudaginn. Stjórarnir rifust á hliðarlínunni á meðan á leiknum stóð og eftir á kallaði Lampard kollega sinn hrokafullan.
Lampard brást illur við á hliðarlínunni eftir að Liverpool fékk aukaspyrnu á hættulegum stað og vont varð verra fyrir Lampard þegar Trent Alexander-Arnold skoraði beint úr aukaspyrnunni. Í viðtölum eftir leik sagði Englendingurinn: „Vel gert hjá Liverpool að vinna deildina en þeir mega ekki vera of hrokafullir. Þess vegna varð ég pirraður. Þetta er búið núna og þetta var aðeins í hita leiksins.“
Klopp var ekki sáttur með þessi ummæli Lapmards og svaraði honum á blaðamannafundi sínum í dag fyrir lokaumferðina sem fer fram á sunnudaginn. „Við erum ekki hrokafullir, þú getur ekki hreytt því í okkur,“ hefur BBC eftir Klopp.
„Frank er keppnismanneskja og ég ber mikla virðingu fyrir því. Menn segja ýmislegt á hliðarlínunni og rífast en þegar leikurinn er búinn er það mál sömuleiðis útrætt. Hann verður að læra það, að þegar leikurinn er búinn þá hætta menn að rífast.“