Fulham stendur mjög vel að vígi í umspilinu um sæti í ensku úrvalsdeildinni í knattspyrnu eftir að hafa sigrað Cardiff City, 2:0, á útivelli í fyrri leik liðanna sem fram fór í Cardiff í Wales í kvöld.
Joshua Onomah kom Fulham yfir í byrjun síðari hálfleiks og Neeskens Kebano bætti marki við rétt fyrir leikslok. Liðin mætast aftur á bökkum Thames í London á fimmtudaginn en sigurliðið samanlagt mætir Swansea eða Brentford í úrslitaleiknum. Swansea vann fyrri leikinn í því einvígi, 1:0.