Willian, sóknarmaður enska knattspyrnufélagsins Chelsea, gæti skrifað undir nýjan samning við félagið eftir allt saman en orðrómur um félagaskipti hans til annars liðs hefur verið hávær undanfarnar vikur.
Brasilíumaðurinn verður samningslaus hjá Chelsea á næstu dögum og þótti ekki líklegt að hann myndi framlengja í Lundúnum. Frank Lampard, stjóri liðsins, hefur hins vegar vonast til að geta endursamið við leikmanninn og segir nú Sky Sports frá því að nýr tveggja ára samningur sé í bígerð.
Arsenal er sagt hafa mikinn áhuga á að semja við leikmanninn en Barcelona, Manchester United og Inter Miami, knattspyrnulið Davids Beckhams, eru öll sögð fylgjast með gangi mála.
Sóknarmaðurinn, sem er orðinn 31 árs gamall, kostaði 30 milljónir punda en hann kom til enska félagsins frá Anzhi Makhachkala í Rússlandi á sínum tíma. Willian hefur verið algjör lykilmaður í liði Chelsea undanfarin ár en hann hefur tvívegis orðið Englandsmeistari með liðinu, 2015 og 2017. Þá varð hann bikarmeistari með Chelsea 2018 og Evrópumeistari 2019. Willian á að baki 70 landsleiki þar sem hann hefur skorað níu mörk en hann lék sinn fyrsta landsleik árið 2011.