Enska úrvalsdeildarfélagið West Ham hefur gengið frá lánssamningi við Said Benrahma frá Brentford í B-deildinni. Getur West Ham keypt sóknarmanninn á 21 milljón punda eftir leiktíðina.
West Ham greiðir um fjórar milljónir punda fyrir lánssamninginn. Ætlaði West Ham upprunalega að kaupa Benrahma en forráðamenn félagsins höfðu áhyggjur af einhverju sem kom í ljós í læknisskoðun leikmannsins, en West Ham hefur ekki gefið nánar út hvað það var.
Benrahma var einn besti leikmaður B-deildarinnar á síðustu leiktíð og skoraði 17 mörk í 46 leikjum með Brentford. Fór liðið alla leið í úrslit umspilsins en tapaði að lokum fyrir Fulham, 1:2.
Hefur hann leikið fjóra landsleiki með Alsír, en hann lék með Nice í Frakklandi áður en hann hélt til Brentford. West Ham er í tíunda sæti ensku úrvalsdeildarinnar með sex stig eftir fjóra leiki.