Liverpool vill festa kaup á franska varnarmanninum Dayot Upamecano til að leysa Virgil van Dijk af hólmi en Hollendingurinn verður lengi frá vegna hnémeiðsla.
Van Dijk meiddist eftir ljóta tæklingu hjá Jordan Pickford í leik Liverpool og Everton á laugardaginn var og þarf að fara í aðgerð. Liverpool seldi Dejan Lovren í sumar og eru þeir Joe Gomez og Joël Matip einu miðverðir liðsins sem eru heilir heilsu. Miðjumaðurinn Fabinho hefur leyst Van Dijk af í síðustu leikjum.
Upamecano hefur vakið athygli fyrir frammistöðu sína fyrir Leipzig í þýsku efstu deildinni og var hann orðaður við stórliðin í Evrópu síðasta sumar. Samkvæmt Sunday World er hann falur fyrir um 45 milljónir evra og ætla forráðamenn Liverpool að reyna að kaupa hann í janúar.