Sergio Agüero, framherji enska knattspyrnufélagsins Manchester City, fór meiddur af velli í hálfleik þegar liðið gerði 1:1-jafntefli við West Ham í London í ensku úrvalsdeildinni um síðustu helgi.
Framherjinn byrjaði tímabilið á meiðslalistanum en hann verður fjarri góðu gamni þegar City heimsækir Marseille í Meistaradeild Evrópu í kvöld.
Agüero er að glíma við vöðvameiðsli en hann var að jafna sig á hnémeiðslum og gæti hann verið frá næstu vikurnar.
„„Agüero er meiddur og verður frá næstu tvær til þrjár vikurnar,“ sagði Pep Guardiola, knattspyrnustjóri City, á blaðamannafundi fyrir leikinn gegn Marseille í vikunni.
Framherjinn gæti því misst af stórleik Manchester City og Liverpool sem fram fer hinn 8. nóvember næstkomandi á Etihad-vellinum í Manchester.