Enska B-deildarfélagið Sheffield Wednesday hefur ráðið hinn 62 ára gamla Tony Pulis sem nýjan knattspyrnustjóra liðsins. Pulis tekur við starfinu af Garry Monk sem var rekinn á mánudag.
Sheffield-liðið byrjaði með mínus 12 stig í B-deildinni á leiktíðinni fyrir brot á fjármálareglum, en eftir áfrýjun var refsingin minnkuð niður í sex stig.
Liðið er í 23. sæti B-deildarinnar með sex stig eftir þrjá sigra, þrjú jafntefli og fimm töp í ellefu umferðum, en liðið hafnaði í 16. sæti á síðustu leiktíð.
Pulis er mikill reynslubolti og hefur stýrt liðum á borð við Middlesbrough, WBA, Crystal Palace og Stoke.