Newcastle skoraði tvö í blálokin

Callum Wilson skorar fyrra mark leiksins.
Callum Wilson skorar fyrra mark leiksins. AFP

Newcastle United vann góðan 2:0 sigur gegn Crystal Palace í ensku úrvalsdeildinni í knattspyrnu karla í kvöld. Callum Wilson og Joelinton skoruðu mörkin.

Það virtist stefna í markalaust jafntefli á Selhurst Park eftir heldur bragðdaufan leik en framherjar Newcastle voru á öðru máli.

Á 88. mínútu skoraði Wilson eftir frábæran undirbúning Joelinton. Tveimur mínútum síðar launaði Wilson greiðann þegar hann lagði upp mark fyrir Joelinton.

Lokatölur því 2:0 og kærkominn sigur Skjóranna staðreynd. Newcastle fer með sigrinum upp í 10. sæti deildarinnar með 14 stig eftir 10 leiki. Crystal Palace er í 13. sæti með 13 stig eftir jafnmarga leiki.

mbl.is