Harry Kane, framherji enska knattspyrnufélagsins Tottenham, er að glíma við meiðsli og æfði ekki með liðinu í morgun en þetta staðfesti José Mourinho, stjóri liðsins, á blaðamannafundi í hádeginu.
Tottenham mætir Arsenal í stórleik ensku úrvalsdeildarinnar á sunnudaginn kemur en Mourinho staðfesti að Kane muni issa af leik Tottenham gegn LASK í Evrópudeildinni á morgun.
„Kane er að glíma við meiðsli en ég ætla ekki að fara nákvæmlega út í það hvers eðlis meiðslin eru,“ sagði Mourinho.
„Hann verður ekki með á morgun en ég vonast til þess að hann verði klár í slaginn gegn Arsenal.
Ég er ekki að reyna fegra þetta eitthvað, ég er bjartsýnn á að hann spili, og þangað til annað kemur í ljós stefnum við á að hann verði í byrjunarliðinu,“ bætti Mourinho við.
Tottenham er með 21 stig í efsta sæti deildarinnar, jafn mörg stig og Liverpool, en betri marktölu.