Chelsea er komið á topp ensku úrvalsdeildarinnar í fótbolta eftir 3:1-sigur á Leeds á heimavelli í kvöld.
Leeds byrjaði með látum og komst yfir strax á fjórðu mínútu er Patrick Bamford skoraði eftir sendingu frá Kalvin Phillips. Bamford slapp inn fyrir vörn Chelsea, lék á Edouard Mendy í markinu og skoraði í autt markið.
Staðan var 1:0 þangað til á 27. mínútu en þá jafnaði Olivier Giroud metin með marki af stuttu færi eftir fyrirgjöf Reece James og var staðan í leikhléi 1:1. Þannig var hún fram að 61. mínútu er Kurt Zouma skallaði í netið eftir hornspyrnu frá Mason Mount.
Chelsea gulltryggði síðan 3:1-sigur með marki Christian Pulisic í uppbótartíma eftir stoðsendingu frá Timo Werner. Werner fékk fjölmörg færi í leiknum en tókst ekki að komast á blað.
Chelsea er með 22 stig, einu stigi á undan Liverpool og Tottenham sem eiga bæði leik á morgun.