Hollenski varnarmaðurinn Timothy Fosu-Mensah er genginn til liðs við þýska knattspyrnufélagið Bayer Leverkusen.
Þetta staðfesti þýska félagið á samfélagsmiðlum sínum í dag en Fosu-Mensah kemur til félagsins frá Manchester United þar sem hann hefur leikið frá árinu 2016.
Varnarmaðurinn hefur ekki átt fast sæti í liði United en samningur hans við enska félagið átti að renna út næsta sumar.
Fosu-Mensah var ekki tilbúinn að skrifa undir framlengingu við United og því ákvað enska félagið að selja hann til Þýskalands fyrir 1,5 milljónir punda.
Hollendingurinn lék 30 leiki fyrir United í öllum keppnum og þá á hann að baki þrjá landsleiki fyrir Holland.