Kelechi Iheanacho tryggði Leicester jafntefli þegar liðið heimsótti Burnley á Turf Moor í ensku úrvalsdeildinni í knattspyrnu í kvöld.
Matej Vydra kom Burnley yfir strax á 4. mínútu eftir slæm mistök Hamza Choudhury en Iheanacho jafnaði metin fyrir Leicester á 34. mínútu og lokatölur því 1:1.
Jafntefli gerir lítið fyrir Leicester sem er í harðri baráttu á toppi deildarinnar en liðið er með 50 stig í þriðja sæti deildarinnar.
Burnley er í fimmtánda sætinu með 29 stig, sex stigum frá fallsæti.
Þá reyndist David McGoldrick hetja Sheffield United þegar liðið fékk Aston Villa í heimsókn á Bramall Lane.
Leiknum lauk með 1:0-sigri Sheffield United. McGoldrick skoraði sigurmark Sheffield United á 30. mínútu.
Þetta var fjórði sigur Sheffield United á tímabilinu en liðið er með 14 stig í neðsta sæti deildarinnar.
Aston Villa er í níunda sætinu með 39 stig.