Átta sigrar í ellefu leikjum

Þjóðverjinn Thomas Tuchel stýrði Chelsea til sigurs þegar liðið fékk Gylfa Þór Sigurðsson og liðsfélaga hans í Everton í heimsókn í ensku úrvalsdeildinni í knattspyrnu á Stamford Bridge í London í gær.

Ben Godfrey, varnarmaður Everton, varð fyrir því óláni að skora sjálfsmark í fyrri hálfleik eftir að skot Kai Havertz hrökk af honum og í netið.

Það var svo Jorginho sem bætti við öðru marki Chelsea með marki úr vítaspyrnu eftir að Jordan Pickford, markvörður Everton, hafði brotið á Havertz innan teigs, og lokatölur því 2:0 fyrir Chelsea.

Gylfi Þór Sigurðsson bar fyrirliðabandið hjá Everton í leiknum en honum var skipt af velli á 70. mínútu.

Það virðist ekkert getað stöðvað Chelsea þessa dagana en Tuchel tók við þjálfun liðsins af Frank Lampard 26. janúar.

Síðan þá hefur liðið leikið ellefu leiki í öllum keppnum, unnið átta þeirra og gert þrjú jafntefli. Tuchel á því ennþá eftir að tapa sínum fysta leik sem knattspyrnustjóri Chelsea.

Þá setti þýski stjórinn met í gær en hann er fyrsti stjórinn í sögu ensku úrvalsdeildarinnar sem nær að halda marki sínu hreinu í fyrstu fimm heimaleikjum sínum í deildinni.