Ósáttur við leikmenn sem brutu sóttvarnalög

Brendan Rodgers, knattspyrnustjóri Leicester á Englandi, segist gífurlega ósáttur við þá leikmenn liðsins sem brutu sóttvarnalög með því að halda teiti í heimahúsi um síðustu helgi.

James Maddison, Hamza Choudhury og Ayoze Pérez voru ekki í leikmannahópi liðsins í 2:3-tapinu fyrir West Ham í dag vegna agabanna vegna brota á sóttvarnalögum. Þá hefur Harvey Barnes verið nefndur í enskum fjölmiðlum, en hann hefði hvort eð er misst af leiknum vegna meiðsla. 

„Auðvitað eru þetta mikil vonbrigði og stór mistök hjá þeim. Þetta endurspeglar ekki þá sem manneskjur og endurspeglar ekki gildi hópsins. Ég hikaði ekki við að taka þá úr liðinu, en nú er þetta í fortíðinni og þeir koma aftur inn í liðið fyrir næsta leik,“ sagði Rodgers við Sky eftir leik.

• Blogga um frétt